א ויהי כאשר-תמו כל-הגוי, לעבור את-הירדן; {פ}
ויאמר יהוה, אל-יהושוע לאמור.
ב קחו לכם מן-העם, שנים עשר אנשים--איש-אחד איש-אחד, משבט.
ג וצוו אותם, לאמור, שאו-לכם מזה מתוך הירדן ממצב רגלי הכוהנים,
הכין שתים-עשרה אבנים; והעברתם אותם, עימכם, והנחתם אותם, במלון אשר-תלינו
בו הלילה. {ס}
ד ויקרא יהושוע, אל-שנים העשר איש, אשר הכין, מבני ישראל--איש-אחד איש-אחד, משבט.
ה ויאמר להם, יהושוע, עברו לפני ארון יהוה אלוהיכם, אל-תוך הירדן; והרימו לכם איש אבן אחת, על-שכמו, למספר, שבטי בני-ישראל.
ו למען, תהיה זאת אות--בקרבכם: כי-ישאלון בניכם מחר לאמור, מה האבנים האלה לכם.
ז ואמרתם להם, אשר נכרתו מימי הירדן מפני ארון ברית-יהוה--בעוברו
בירדן, נכרתו מי הירדן; והיו האבנים האלה לזיכרון, לבני ישראל--עד-עולם.
ח ויעשו-כן בני-ישראל, כאשר ציווה יהושוע, וישאו שתי-עשרה אבנים
מתוך הירדן כאשר דיבר יהוה אל-יהושוע, למספר שבטי בני-ישראל; ויעבירום עימם
אל-המלון, ויניחום שם.
ט ושתים עשרה אבנים, הקים יהושוע בתוך הירדן--תחת מצב רגלי הכוהנים, נושאי ארון הברית; ויהיו שם, עד היום הזה.
י והכוהנים נושאי הארון, עומדים בתוך הירדן, עד תום כל-הדבר
אשר-ציווה יהוה את-יהושוע לדבר אל-העם, ככול אשר-ציווה משה את-יהושוע;
וימהרו העם, ויעבורו.
יא ויהי כאשר-תם כל-העם, לעבור; ויעבור ארון-יהוה והכוהנים, לפני העם.
יב ויעברו בני-ראובן ובני-גד וחצי שבט המנשה, חמושים, לפני, בני ישראל--כאשר דיבר אליהם, משה.
יג כארבעים אלף, חלוצי הצבא--עברו לפני יהוה, למלחמה, אל, ערבות יריחו. {ס}
יד ביום ההוא, גידל יהוה את-יהושוע, בעיני, כל-ישראל; וייראו אותו, כאשר יראו את-משה כל-ימי חייו. {פ}
טו ויאמר יהוה, אל-יהושוע לאמור.
טז צווה, את-הכוהנים, נושאי, ארון העדות; ויעלו, מן-הירדן.
יז ויצו יהושוע, את-הכוהנים לאמור: עלו, מן-הירדן.
יח ויהי כעלות הכוהנים נושאי ארון ברית-יהוה, מתוך הירדן, ניתקו
כפות רגלי הכוהנים, אל החרבה; וישובו מי-הירדן למקומם, וילכו כתמול-שלשום
על-כל-גדותיו.
יט והעם, עלו מן-הירדן, בעשור, לחודש הראשון; ויחנו, בגלגל, בקצה, מזרח יריחו.
כ ואת שתים עשרה האבנים האלה, אשר לקחו מן-הירדן--הקים יהושוע, בגלגל.
כא ויאמר אל-בני ישראל, לאמור: אשר ישאלון בניכם מחר את-אבותם לאמור, מה האבנים האלה.
כב והודעתם, את-בניכם לאמור: ביבשה עבר ישראל, את-הירדן הזה.
כג אשר-הוביש יהוה אלוהיכם את-מי הירדן, מפניכם--עד-עוברכם: כאשר עשה יהוה אלוהיכם לים-סוף אשר-הוביש מפנינו, עד-עוברנו.
כד למען דעת כל-עמי הארץ, את-יד יהוה, כי חזקה, היא--למען יראתם את-יהוה אלוהיכם, כל-הימים.
Tidak ada komentar:
Posting Komentar