א וייגשו, ראשי אבות הלויים, אל-אלעזר הכוהן, ואל-יהושוע בן-נון; ואל-ראשי אבות המטות, לבני ישראל.
ב וידברו אליהם בשילה, בארץ כנען לאמור, יהוה ציווה ביד-משה, לתת-לנו ערים לשבת; ומגרשיהן, לבהמתנו. {פ}
ג וייתנו בני-ישראל ללויים מנחלתם, אל-פי יהוה, את-הערים האלה, ואת-מגרשיהן.
ד וייצא הגורל, למשפחות הקהתי; ויהי לבני אהרון הכוהן מן-הלויים, ממטה יהודה וממטה השמעוני וממטה בנימין בגורל--ערים, שלוש עשרה. {ס}
ה ולבני קהת הנותרים, ממשפחות מטה-אפריים וממטה-דן ומחצי מטה מנשה בגורל--ערים עשר. {ס}
ו ולבני גרשון, ממשפחות מטה-יששכר וממטה-אשר וממטה נפתלי ומחצי מטה מנשה בבשן בגורל--ערים, שלוש עשרה. {ס}
ז לבני מררי למשפחותם, ממטה ראובן וממטה-גד וממטה זבולון--ערים, שתים עשרה. {ס}
ח וייתנו בני-ישראל ללויים, את-הערים האלה ואת-מגרשיהן, כאשר ציווה יהוה ביד-משה, בגורל. {פ}
ט וייתנו, ממטה בני יהודה, וממטה, בני שמעון--את הערים האלה, אשר-יקרא אתהן בשם.
י ויהי לבני אהרון, ממשפחות הקהתי מבני לוי: כי להם היה הגורל, ראשונה.
יא וייתנו להם את-קרית ארבע אבי הענוק, היא חברון--בהר יהודה; ואת-מגרשיה, סביבותיה.
יב ואת-שדה העיר, ואת-חצריה, נתנו לכלב בן-יפונה, באחוזתו. {ס}
יג ולבני אהרון הכוהן, נתנו את-עיר מקלט הרוצח--את-חברון, ואת-מגרשיה; ואת-לבנה, ואת-מגרשיה.
יד ואת-יתיר, ואת-מגרשיה, ואת-אשתמוע, ואת-מגרשיה.
טו ואת-חולון, ואת-מגרשיה, ואת-דביר, ואת-מגרשיה.
טז ואת-עין ואת-מגרשיה, ואת-יוטה ואת-מגרשיה, את-בית שמש, ואת-מגרשיה: ערים תשע--מאת, שני השבטים האלה. {ס}
יז וממטה בנימין, את-גבעון ואת-מגרשיה, את-גבע, ואת-מגרשיה.
יח את-ענתות, ואת-מגרשיה, ואת-עלמון, ואת-מגרשיה: ערים, ארבע.
יט כל-ערי בני-אהרון, הכוהנים--שלוש-עשרה ערים, ומגרשיהן. {ס}
כ ולמשפחות בני-קהת הלויים, הנותרים מבני קהת; ויהי ערי גורלם, ממטה אפריים.
כא וייתנו להם את-עיר מקלט הרוצח, את-שכם ואת-מגרשיה--בהר אפריים; ואת-גזר, ואת-מגרשיה.
כב ואת-קבציים, ואת-מגרשיה, ואת-בית חורון, ואת-מגרשיה: ערים, ארבע. {ס}
כג וממטה-דן--את-אלתקא, ואת-מגרשיה; את-גיבתון, ואת-מגרשיה.
כד את-איילון, ואת-מגרשיה, את-גת-רימון, ואת-מגרשיה: ערים, ארבע.
כה וממחצית, מטה מנשה--את-תענך ואת-מגרשיה, ואת-גת רימון ואת-מגרשיה: ערים, שתיים.
כו כל-ערים עשר, ומגרשיהן, למשפחות בני-קהת, הנותרים. {ס}
כז ולבני גרשון, ממשפחות הלויים--מחצי מטה מנשה את-עיר מקלט הרוצח, את-גולן בבשן ואת-מגרשיה ואת-בעשתרה ואת-מגרשיה: ערים, שתיים. {ס}
כח וממטה יששכר, את-קשיון ואת-מגרשיה; את-דברת, ואת-מגרשיה.
כט את-ירמות, ואת-מגרשיה, את-עין גנים, ואת-מגרשיה: ערים, ארבע. {ס}
ל וממטה אשר, את-משאל ואת-מגרשיה; את-עבדון, ואת-מגרשיה.
לא את-חלקת, ואת-מגרשיה, ואת-רחוב, ואת-מגרשיה: ערים, ארבע. {ס}
לב וממטה נפתלי את-עיר מקלט הרוצח, את-קדש בגליל ואת-מגרשיה ואת-חמות דאר ואת-מגרשיה, ואת-קרתן, ואת-מגרשיה: ערים, שלוש.
לג כל-ערי הגרשוני, למשפחותם--שלוש-עשרה עיר, ומגרשיהן. {ס}
לד ולמשפחות בני-מררי, הלויים הנותרים--מאת מטה זבולון, את-יוקנעם ואת-מגרשיה; את-קרתה, ואת-מגרשיה.
לה את-דמנה, ואת-מגרשיה, את-נהלל, ואת-מגרשיה: ערים, ארבע. {ס}
לו וממטה-גד, את-עיר מקלט הרוצח, את-רמות בגלעד, ואת-מגרשיה; ואת-מחניים, ואת-מגרשיה.
לז את-חשבון, ואת-מגרשיה, את-יעזר, ואת-מגרשיה: כל-ערים, ארבע.
לח כל-הערים לבני מררי, למשפחותם, הנותרים, ממשפחות הלויים; ויהי, גורלם--ערים, שתים עשרה.
לט כול ערי הלויים, בתוך אחוזת בני-ישראל--ערים ארבעים ושמונה, ומגרשיהן.
מ תהיינה, הערים האלה--עיר עיר, ומגרשיה סביבותיה: כן, לכל-הערים האלה. {ס}
מא וייתן יהוה, לישראל, את-כל-הארץ, אשר נשבע לתת לאבותם; ויירשוה, ויישבו בה.
מב וינח יהוה להם מסביב, ככול אשר-נשבע לאבותם; ולא-עמד איש בפניהם, מכל-אויביהם--את כל-אויביהם, נתן יהוה בידם.
מג לא-נפל דבר--מכול הדבר הטוב, אשר-דיבר יהוה אל-בית ישראל: הכול, בא.
Tidak ada komentar:
Posting Komentar